Понеделник, 11 септември 2017 година
Средба на пратеникот Димитриевски со шефот на Канцеларијата за врски на НАТО во Македонија, г. Горазд Бартол
Пратеникот Максим Димитриевски, претседател на Комисијата за одбрана и безбедност, денеска во Собранието на Република Македонија се сретна со шефот на Канцеларијата за врски на НАТО во Македонија, г. Горазд Бартол.
Господин Димитриевски и господин Бартол разменија мислења за политичката состојба, поддршката на Комисијата за одбрана и безбедност, заложбата и посветеноста за реформите во одбранбено-безбедносниот сектор, како и членството на земјата во НАТО и ЕУ.
Шефот на Канцеларијата за врски на НАТО во Македонија, г. Горазд Бартол на средбата ја истакна својата подготвеност за поддршка и пренесување на своите искуства во однос на воените аспекти на реформите во безбедносниот сектор,со цел да придонесе за забрзување на евроатлантските интеграции и воедно истакна дека е отворен за соработка со Комисијата за одбрана и безбедност во разгледувањето на прашањата кои се однесуваат на одбраната и безбедноста, а кои се дел од амбициозната реформаторска агенда.
На крајот истакна дека ова е прва покана за средба со претставник од Комисијата за одбрана и безбедност за што го изрази своето задоволство.
Пратеникот Димитриевски посочи дека перспективата за евроатлантската интеграција за Република Македоонија има повеќе предности и тоа од една страна, трансформација на општеството, јакнење на одбранбено-воените способности, а од друга, со својот придонес, Македонија докажа дека Алијансата има сигурен сојузник, кој како и досега ефикасно ќе придонесува за обезбедување на регионалниот и глобалниот мир и безбедност.
Исто така, истакна дека како Комисија за одбрана и безбедност, односно како Собрание на Република Македонија, остануваат посветени на реализацијата на евроинтегративниот процес на Република Македонија, и институционалната соработка со земјите членки на Европската Унија и НАТО ја сметаат за клучно за унапредување на истиот. Воедно истакна дека со приемот на Република Македонија во Алијансата, дополнително ќе зајакне Јужното крило на НАТО, кое е соочено со сериозни предизвици поради напливот на бегалци од Средниот Исток и Северна Африка и заканата од терористички напади од ИСИЛ.
Господин Димитриевски го запозна господин Бартол за идејата на Комисијата за одбрана и безбедност, со поддршка на Собранието на Република Македонија, за организирање на Меѓународен состанок на тема „Регионална безбедност и соработка, справување со актуелните безбедносни предизвици и зајакнување на безбедноста и стабилноста во регионот”. Средбата би била можност за учесниците да разменат искуства поврзани со регионалната безбедност и соработка, како и со актуелните безбедносни предизвици.
Двајцата истакнаа позитивно мислење за организација на ваков состанок со оглед на важноста и потребата од негувањето на политиката за добрососедските односи, целосната посветеност на регионалната соработка и спроведување на реформите во делот на одбраната и безбедноста.
На крајот, г. Димитриевски нагласи дека интеграцијата во НАТО и членството во Европската Унија се апсолутни приоритети на нашата држава.