Среда, 17 ноември 2010 година
Самит посветен на рамноправноста
На 15 и 16 ноември оваа година, во Брисел се одржа Четвртиот самит посветен на рамноправноста, во рамките на Белгиското претседателство со ЕУ. Во фокусот на Самитот беше борбата против дискриминацијата и промовирање на еднаквоста на работното место.
Десет години по донесувањето на Директивата 2000/78/CE на Советот за воспоставување на општа рамка за еднаков третман при вработување и професијата, на Самитот се изврши проценка на примената на Директивата и анализа на постигнатиот напредок во законодавството кај земјите членки на Унијата, на улогата на социјалните партнери и влијанието на програмите за борбата против четирите видови на дискриминација опфатени со Директивата.
На Самитот учествуваа околу 500 високи претставници од земјите членки на ЕУ, земјите кандидати, Европската асоцијација за слободна трговија (ЕФТА), социјални партнери, претставници на организации за еднаквост, европски невладини и меѓународни организации.
Целта на Белгиското претседателство со ЕУ, за овој Самит беше да се идентификува пристапот за зајакнување на стратегијата за борба против дискриминација при вработувањето.