E martë , 24 mars 2015
Mbledhja e njëzetepesë e Komisionit për Transport, Lidhje dhe Ekologji
Komisioni për Transport, Lidhje dhe Ekologji i Kuvendit të Republikës së Maqedonisë, në mbledhjen e sotme të 25-së, si trup punues amë, në lexim të dytë, i shqyrtoi:
- Propozim-ligjin për ndryshimin dhe plotësimin e Ligjit për shitje dhe dhënie me qira të ndërtesave afariste dhe hapësirave afariste të Republikës së Maqedonisë ;
- Propozim-ligjin për ndryshimin dhe plotësimin e Ligjit për menaxhim me hedhurina.
Në mbledhjen e Komisionit, në cilësinë e përfaqësuesve të Qeverisë së Republikës së Maqedonisë , morën pjesë ministri i transportit dhe lidhjeve, z. Mile Janakieski dhe zëvendësministri i mjedisit jetësor dhe planifikimit hapësinor, z. Stevo Temelkovski.
Kryetari i Komisionit, z. Rexhail Ismaili, i njoftoi deputetët se në afatin e përcaktuar me Rregulloren e Kuvendit të Republikës së Maqedonisë, sipas Propozim ligjit për ndryshimin dhe plotësimin e Ligjit për shitje dhe dhënie me qira të ndërtesave afariste dhe hapësirave afariste të Republikës së Maqedonisë, është parashtruar një amendament nga deputetët z. Ramis Merko dhe z. Musa Ibrahimi, i cili me 2 vota “për” dhe 5 “kundër” nuk ishte miratuar, ndërsa sipas Propozim ligjit për ndryshimin dhe plotësimin e Ligjit për menaxhim me hedhurina, nuk ishin parashtruar amendamente.
Komisioni i përcjelli të dy Propozim ligjet në procedurë të mëtejme në Kuvendin e Republikës së Maqedonisë.