E premte, 19 shkurt 2016
MBLEDHJA E PESËDHJETEKATËRTË E KOMISIONIT PËR TRANSPORT, LIDHJE DHE EKOLOGJI
Komisioni për Transport, Lidhje dhe Ekologji i Kuvendit të Republikës së Maqedonisë, në mbledhjen e 54-të, si trup punues amë, në lexim të dytë, shqyrtoi:
- Propozim-ligj për vendskijim;
- Propozim-ligj për ndryshimin dhe plotësimin e Ligjit për transport në komunikacionin rrugor.
Në mbledhjen e Komisionit për Transport, Lidhje dhe Ekologji në cilësi të përfaqësuesit të Qeverisë së Republikës së Maqedonisë ishte i pranishëm zëvendësministri i Transportit dhe Lidhjeve, z. Nimetulla Halimi.
Kryetari i Komisionit, z. Rexhail Ismaili i njoftoi deputetët se në afatin e caktuar me Rregulloren e Kuvendit të Republikës së Maqedonisë, për Propozim-ligjin për vendskijim janë parashtruar 23 amendamente nga të cilat 16 u miratuan, 2 nuk u miratuan dhe 5 u tërhoqën nga propozuesit e autorizuar.
Në shqyrtimin e amendamenteve morën pjesë deputetët: znj. Liljana Zaturoska, z. Tomisllav Tuntev dhe z. Vasko Kovaçevski si dhe zëvendësministri i Transportit dhe Lidhjeve, z. Nimetulla Halimi.
Ndërsa për Propozim-ligjin për ndryshimin dhe plotësimin e Ligjit për transport në komunikacionin rrugor, Komisioni nuk i shqyrtoi 2 amendamentet e parashtruara sepse ato u tërhoqën nga propozuesit e autorizuar.
Në fund të debatit, Komisionit i përcolli Propozim-ligjet në procedurë të mëtutjeshme në Kuvendin e Republikës së Maqedonisë.