E mërkurë, 7 shkurt 2018
Grubi realizoi takim me kongresistët Roskam, Aderholht, Ratklif, Bak, Mulenar dhe Dingëll
Kryetari i Grupit të Kuvendit për Miqësi me SHBA-në, deputeti Artan Grubi njëkohësisht kryetar edhe i Komisionit për Çështje Evropiane të Kuvendit, e vazhdoi vizitën e tij zyrtare në SHBA me më shumë kolegë të tij në Kongresin e SHBA-së.
Grubi realizoi takime me kongresistët Peter Roskam, Robert Aderholht, Xhon Reklif, Keni Bak, Xhon Mulenar dhe Debi Dingëll, si dhe senatorë dhe kongresistë tjerë.
Në të gjitha takimet, Grubi foli rreth nevojës së domosdoshme për përfshirjen aktive dhe urgjente të Uashingtonit në gjetjen e zgjidhjes dinjitoze për kontestin e emrit me fqinjin tonë jugor.
Grubi theksoi se shumica parlamentare dhe qeveria reformuese kanë rezultate të dukshme dhe pothuajse të shkëlqyera në përmbushjen e obligimeve reformuese të vendit, finalizimin e pjesës normative të Marrëveshjes së Ohrit dhe e ratifikuam Marrëveshjen për fqinjësi të mirë me Bullgarinë.
Pengesa jonë e vetme në rrugën drejt NATO-s dhe BE-së është vetëm kontesti me Athinën dhe SHBA-ja mund të japë kontribut të çmuar në tejkalimin e dallimeve siç kanë kontribuuar vazhdimisht në momentet historike për ne dhe rajonin.
Të gjithë bashkëbiseduesit, pa përjashtim, theksuan mbështetje të madhe për Maqedoninë, gatishmëri të ndihmojnë përmes veprave konkrete, si dhe na inkurajojnë ta bëjmë hapin kryesor drejt anëtarësimit të plotfuqishëm në NATO i cili do të sigurojë paqe të qëndrueshme, siguri, stabilitet dhe zhvillim ekonomik.
Maqedonia euroatlantike, me institucione të besueshme dhe reforma të realizuara ka shumë miq në Uashington.
Në fund, Grubi kërkoi nga të gjithë bashkëbiseduesit që konkretisht të ndihmojnë përmes qëndrimeve publike, letrave dhe kërkesave deri te Kabineti i Presidentit të SHBA-së e kështu me radhë, për përfshirjen më aktive të Uashingtonit në gjetjen e zgjidhjes konsekuente, me ç’rast ata u angazhuan që të ndihmojnë dhe të komunikojnë me Departamentin e Shtetit në lidhje me këtë çështje.