Вторник, 11 септември 2012 годинаМакедонија и Израел – држави со плодна соработка
Пратеникот Павле Трајанов, во својство на претседател на Парламентарната група за соработка со Парламентот на Државата Израел, денеска оствари средба со Н.Е. Јозеф Амрани, вонреден и ополномоштен амбасадор на Државата Израел за Република Македонија, со седиште во Загреб.
На средбата, г. Павле Трајaнов на новоименуваниот амбасадор му посака успешна работа и го запозна со работата на Парламентот, при што истакна дека во Собранието на Република Македонија постои Парламентарната група за соработка со Парламентот на Државата Израел и дека Парламентот има добра соработка со Кнесетот на Државата Израел.
Двете држави имаат добра соработка во областа на земјоделството, туризмот, медицината, а има и доста млади кои сакаат да го продолжат своето школување во Израел. Постојат многу можности за понатамошна плодна соработка, истакна г. Трајанов.
![](WBStorage/Articles/6ACD68C58784824DAC18F9438F9061A9.jpg)
Н.Е. Јозеф Амрани истакна дека парламентите имаат значајна улога во севкупните односи меѓу двете држави и дека се потпишани многу договори во однос на економијата. Исто така, тој потенцираше дека израелски бизнисмени се многу активни во Република Македонија и дека особено има големи можности за соработка во земјоделството.
Амбасадорот информира дека го посетил Меморијалниот центар на холокаустот и, според него, самиот чин на отворање на овој центар е значаен и праќа порака до младите генерации во регионот да не се заборави она што се случило.
Според него, Центарот би требало да прерасне во центар за толеранција и разбирање во кој ќе се вршат обуки за младите воопшто за толеранцијата.