Петок, 2 јануари 2015 година
Летонија – нов претседавач со ЕУ
Од стартот на 2015 година, Летонија го зазеде претседавачкото место со Советот на Европската унија. Оваа балтичка земја го презеде шестмесечното ротационо претседателство од Италија, а на 1 јули ќе му го предаде на Луксембург.
Во наредните шест месеци, основните принципи за Летонија ќе бидат: вклученост, развој и одржливост. Како приоритети се наведуваат зголемувањето на конкурентноста и заложбата за енергетска независност на ЕУ. Во фокусот ќе бидат и зајакнувањето на европската економија и отворањето нови работни места.
Во текот на претседавањето, предвидено е да бидат организирани околу двесте настани на различни нивоа во Летонија и околу 1.500 состаноци во Брисел и Луксембург.
За време на претседателството на Летонија, меѓу другото, треба да се одржат Самитот на источното партнерство, 5. Состанок на министри за образование на земјите од АСЕМ, Конференцијата на европските тела за стандардизација, Самитот за Е-здравство, како и УНЕСКО Светскиот ден на слободата на медиумите.