![](content/images/begalci.jpg)
Четврток, 24 септември 2015 година
Со заедничка работа до решавање на бегалската криза
На вчерашниот вонреден самит за бегалската криза, шефовите на државите и владите на Европската унија, изразија согласност дека со предизвиците можат да се соочаат само со заедничка работа, во духот на солидарноста и одговорноста, со почитување, применување и спроведување на постоечките правила.
На состанокот на високо ниво, детално е расправано за тоа како да се постигнат долгорочно одржливи решенија и донесена е одлука во врска со низата неодложни приоритети.
Од институциите и владите на ЕУ е побарана итна посветеност на приоритетните мерки, предложени од страна на Еврокомисијата и оперативни одлуки за најитните прашања, пред состанокот на Европскиот совет во октомври, а во согласност со следниве насоки:
- да се одговори на итните потреби на бегалците во регионот преку помагање на Високиот комесаријат за бегалци на ОН, Светската програма за храна и други агенции, со дополнителен износ од најмалку 1 милијарда евра;
- помош за Либан, Јордан, Турција и другите земји засегнати со сириската бегалска криза, меѓу другото, преку значително зголемување на регионалниот фонд на ЕУ, основан како одговор на реакцијата на сириската криза („Фондот Мадад“);
- зајакнување на дијалогот со Турција на сите нивоа и за време на претстојната посета на турскиот претседател (5 октомври), со цел да се зајакне соработката во запирањето на миграциските текови и управувањето со нив;
- да им се помогне на земјите од Западен Балкан во управувањето со приливот на бегалци, меѓу останатото, преку претпристапните инструменти, како би се осигурала брза и добра подготовка за Конференцијата за западнобалканската рута (8 октомври);
- да се зголеми финансирањето на Кризниот фонд за стабилност и решавање на основните причини за илегалната миграција и раселените лица во Африка, преку дополнителен придонес на земјите-членки, како и да се обезбеди оптимална подготовка за Самитот во Валета (11-12 ноември), со цел да се постигне најголем можен напредок;
- да се реши драматичната ситуација на надворешните граници и да се зајакнат контролите на истите, меѓу другото, преку дополнителни средства за Фронтекс, ЕКПА и Европол, како и со персонал и опрема од земјите-членки;
- да се исполнат барањата на најизложените земји-членки за помош на институциите, агенциите и другите земји-членки, за да се обезбеди идентификација и регистрација на мигрантите, како и добивање нивни отпечатоци од прсти и истовремено да се обезбеди преместување и враќање најдоцна до ноември 2015 година.;
- да се зголеми финансирањето на Кризниот фонд за азил, интеграција и миграција, како и на Фондот за внатрешна безбедност - Граници.
Европските челници упатија апел за вложување меѓународни напори под покровителство на ОН, сè со цел да се стави крај на војната која предизвика толку многу страдања и принуди околу 12 милиони луѓе да ги напуштат своите домови.
ЕУ презема обврска да воспостави влада на национално единство во Либија, а Еврокомисијата да достави предлози за мобилизација на буџетот на ЕУ.