Вторник, 28 мај 2019 година
УЧЕСТВО НА ПРАТЕНИЧКАТА ЛИЛЈАНА ЗАТУРОСКА НА РЕГИОНАЛЕН ПРОЕКТ НА ЕУ ЗА ПОДДРШКА НА МЕДИУМИТЕ
Претседателката на Комисијата за транспорт, врски и екологија, Лилјана Затуроска, во Сараево зеде учество на Регионалниот проект финансиран од ЕУ за поддршка на медиумите за јавни услуги во Западен Балкан.
Со оглед на тоа што состанокот е продолжение на низата од пет национални тркалезни маси во Белград, Подгорица, Приштина, Сараево и Тирана, учество зедоа засегнатите страни од секоја земја, вклучително и највисокиот менаџмент на националните медиуми и нивните владини тела, претставници на Влади/Парламенти, национални радиодифузни регулатори и претставници на релевантни невладини организации, како и релевантни претставници од општеството на земјата домаќин.
Во фокусот на состанокот беше финансирањето на медиумите од јавните служби. Притоа, делегатите имаа можност да ги искажат своите ставови за одржливоста на различните пристапи во националниот контекст на кој го опишуваат моделот за кој сметаат дека најдобро ќе функционира на национално ниво. Презентациите беа проследени со три панел-дискусии, од кои секоја со по тројца експерти, при што беа разгледани различни аспекти на различни модели на финансирање.
Ваквиот процес има за цел постигнување на договор на регионално ниво за принципите што треба да се применат во секоја од земјите партнери во Регионот.