Понеделник, 27 јуни 2016 година
Шеесет и седма седница на Комисијата за транспорт, врски и екологија
Комисијата за транспорт, врски и екологија на Собранието на Република Македонија, на 67. седница, одржана на 23 и 27 јуни 2016 година, како матично работно тело, ги разгледа:
- Годишниот извештај за работата на Агенцијата за пошти во 2015 година;
- Годишниот извештај за работата на Агенцијата за аудио и аудиовизуелни медиумски услуги за 2015 година;
- Годишниот извештај за работата на Агенцијата за електронски комуникации за 2015 година.
На седницата на Комисијата, во својство на претставник од Агенцијата за пошти, присуствуваше директорот, г. Влатко Атанасоски; од Агенцијата за аудио и аудиовизуелни медиумски услуги, директорот, г. Зоран Трајчевски, а како претставник на Агенцијата за електронски комуникации – г-ѓа Гордана Клинчарова, претседател на Комисијата.
Претставниците ги образложија Годишните извештаи.
Во дискусијата по Годишниот извештај за работата на Агенцијата за аудио и аудиовизуелни медиумски услуги за 2015 година учествуваше пратеничката Лилјана Затуроска, а по Годишниот извештај за работата на Агенцијата за електронски комуникации за 2015 година - пратеничката Слаѓана Митовска.
Комисијата со по 6 гласа „за“ по првиет две точки, односно 7 гласа „за“ по третата точка, му предложи на Собранието на Република Македонија да усвои идентичен заклучок во однос на трите извештаи:
- Собранието го разгледа Годишниот извештај;
- Овој заклучок заедно со Извештајот на Комисијата за транспорт, врски и екологија да се достави до Агенцијата.