Вторник, 13 октомври 2015 година
Триесет и четврта седница на Комисијата за земјоделство, шумарство и водостопанство
Комисијата за земјоделство, шумарство и водостопанство на Собранието на Република Македонија, на 34. Седница, одржана на 8 и 9 октомври 2015 година, како матично работно тело, во второ читање, ги разгледа:
- Предлог-законот за изменување и дополнување на Законот за ловството;
- Предлог-законот за изменување и дополнување на Законот за рибарство и аквакултура;
- Предлог-законот за изменување и дополнување на Законот за квалитет на земјоделските производи;
- Предлог-законот за изменување и дополнување на Законот за пасиштата;
- Предлог-законот за изменување и дополнување на Законот за земјоделски задруги;
- Предлог-законот за изменување и дополнување на Законот за водостопанство;
- Предлог-законот за изменување и дополнување на Законот за основање на Агенцијата за финансиска поддршка во земјоделството и руралниот развој;
- Предлог-законот за изменување и дополнување на Законот за тутун и тутунски производи.
На седницата, во својство на претставник на Владата на Република Македонија, присуствуваше г. Ванчо Костадиновски, заменик на министерот за земјоделство, шумарство и водостопанство.
- Претседателот на Комисијата за земјоделство, шумарство и водостопанство, г. Панче Орцев, ги извести пратениците дека во определениот рок утврден со Деловникот на Собранието на Република Македонија, се поднесени вкупно 8 амандмани по Предлог-законот за изменување и дополнување на Законот за ловството.
Два од нив беа поднесени од пратеникот Роза Топузова-Каревска, а предлагачи на преостанатите шест амандмани беа пратениците Панче Орцев, Сашо Поцков, Мира Стојчевска, Милева Ѓорѓиева и Марјан Даскаловски, кон кои се приклучи и пратеникот Горан Сугарески.
Во претресот по амандманите учествуваа пратениците: Панче Орцев, Марјан Даскаловски, Мира Стојчевска, Ромео Тренов, Реџаиљ Исмаили и Марјанчо Колевски. Еден од амандманите предлагачите го повлекоа, а преостанатите седум не беа усвоени.
- Во однос на Предлог-законот за изменување и дополнување на Законот за рибарство и аквакултура, Предлог-законот за изменување и дополнување на Законот за квалитет на земјоделските производи и Предлог-законот за изменување и дополнување на Законот за тутун и тутунски производи, беа поднесени по 9 амандмани, по три од пратеникот Роза Топузова-Каревска и по шест од пратениците Панче Орцев, Сашо Поцков, Мира Стојчевска, Милева Ѓорѓиева и Марјан Даскаловски, кон кои се приклучи и пратеникот Горан Сугарески. Комисијата не усвои ниту еден од амандманите.
- Што се однесува на Предлог-законот за изменување и дополнување на Законот за земјоделски задруги, претседателот на Комисијата ги извести пратениците дека во определениот рок утврден со Деловникот на Собранието на Република Македонија, не се поднесени амандмани.
- По Предлог-законот за изменување и дополнување на Законот за основање на Агенцијата за финансиска поддршка во земјоделството и руралниот развој, беа поднесени два амандмани од страна на пратениците Панче Орцев, Сашо Поцков, Мира Стојчевска, Милева Ѓорѓиева и Марјан Даскаловски, кон кои се приклучи и пратеникот Горан Сугарески. Комисијата со по 3 гласа „за“ и 5 „против“, не ги усвои истите.
- Комисијата ги проследи овие шест Предлог-закони на натамошна постапка во Собранието.
- Во
Дополнетиот предлог на закон за изменување и дополнување на Законот за пасиштата, како и на
Законот за водостопанство, вграден е по еден амандман, поднесен од пратениците Панче Орцев, Сашо Поцков, Мира Стојчевска, Милева Ѓоргиева, Марјан Даскаловски и Горан Сугарески. а по еден, односно два предложени амандмани од истите пратеници не беа усвоени.