Вторник, 17 јули 2018 година
Средба на Комисијата за политички систем и односи меѓу заедниците со Пит Мароко
Комисијата за политички систем и односи меѓу заедниците на Собранието на Република Македонија денеска оствари средба со Пит Мароко, висок претставник на Бирото за операции, конфликти и стабилизации на САД.
На средбата присуствуваа членовите на Комисијата: Бетиане Китев, Весел Мемеди, Чедомир Саздовски, Зоран Илиоски и Африм Гаши.
Претседавачот Китев, во своето воведно излагање изрази задоволство од денешната средба и даде краток вовед за работата и надлежностите на Комисијата.
Поддршката од САД е континуирана, а единствено размислување на сите политички чинители во земјава е интеграцијата во ЕУ семејството и пристапот во НАТО-алијансата, посочи Китев.
Високиот претставник, Мароко се заблагодари за средбата, која се реализира во ова посебно време за Македонија, време на големи достигнувања и неодамнешниот постигнатиот договор со соседна Грција. Воедно изрази надеж дека нема да помине многу време за да не поздрави како триесета земја-членка на НАТО.
Потпретседателот на Собранието, Весел Мемеди го истакна прашањето за насилниот екстремизам кој е присутен насекаде и сме подложни на истиот, но не е посветено многу внимание на овој проблем.
Илиоски посочи дека за намалување на конфликтите и стабилноста на државата треба да владеат законите и да се почитуваат процедурите, а Собранието треба да е пример за тоа.
Присутните се заблагодарија за вложувањата на САД во владеење на правото како апсолутен приоритет и за подготовката на нашата држава за да се приклучи на НАТО-алијансата.
Во завршните согледувања делегацијата од САД го искажа задоволството за нашите чекори и за досега направеното и охрабри во иднина да се продолжи на оваа патека.