Вторник, 2 февруари 2021
Работна средба на пратеникот Зеќир Рамчиливиќ со невладини организации од бошњачката заедница
На иницијатива на пратеникот Зеќир Рамчиловиќ, претседател на Пратеничката група за соработка со Парламентот на Босна и Херцеговина, во Собранието на Република Северна Македонија, се одржа работна средба со претседателите на невладините организации од бошњачката заедница.
На состанокот беа поканети сите активни невладини организации, од кои сите и присуствуваа: Шадрван, Форум на Бошњаците, Еду-Ниса, Диван, Бошњачка културна заедница, Лилиум Босниакум, Диванхана и Љиљан, освен БНВ.
На состанокот присуствуваше и заменик-директорот на Агенцијата за остварување на правата на заедниците (АОПЗ), Џелал Хоџиќ, а беше поканет и директорот на Управата за афирмирање на културата на припадниците на заедниците, Адмир Ујкановиќ, кој беше отсутен од оправдани причини.
Покрај другите прашања значајни за бошњачката заедница, главна тема на состанокот беше и пописот на населението, становите и домаќинствата во април 2021. Пратеникот Рамчиловиќ ги информираше присутните за носењето на законот, досегашните постапки на институциите и состанокот со директорот на ДЗС, Апостол Симовски.
Од страна на присутните беше потенцирано значењето на пописот на населението за развојот на нашата држава. Беше изнесен заклучок со кој Бошњаците го подржуваат овој процес, во кој како помалкубројна заедница транспарентно и активно ќе се вклучат.
„Ме радува фактот што најголем дел од бошњачките организации покажаа дека се општествено одговорни, а со своето присуство и активно учество направија исчекор во кој заедно ќе соработуваат за одвивање на кредибилен и успешен процес во којшто максимално ќе ја имаат мојата поддршка" - истакна пратеникот Рамчиловиќ.
На денешниот состанок беше формирано Координативно тело на Бошњаците за Попис 2021, составено од невладините организации, кое од денеска започнува со своите активности.