Вторник, 29 јуни 2010 година

Петнаесетта седница на Комисијата за култура

Комисијата за култура на Собранието на Република Македонија, на Петнаесеттата седница, одржана на 28 јуни 2010 година, како матично работно тело го разгледа Предлогот на закон за авторското право и сродните права - I читање



Понеделник, 28 јуни 2010 година

Четириесет и четврта седница на Комисијата за економски прашања

Комисијата за економски прашања на Собранието на Република Македонија на својата Четириесет и четврта седница, одржана на 25 јуни 2010 година, како матично работно тело ги разгледа Предлогот на закон за изменување и дополнување на Законот за вршење на занаетчиската дејност (прво читање), Предлогот на закон за изменување и дополнување на Законот за угостителската дејност, прво читање и Предлогот на закон за изменување и дополнување на Законот за трговија (прво читање)

Петнаесетта седница на Националниот совет за евроинтеграции



Петок, 25 јуни 2010 година

Шеесет и седма седница на Комисијата за финансирање и буџет

Комисијата за финансирање и буџет на Собранието на Република Македонија на Шеесет и седмата седница одржана на 24 јуни 2010 година, како матично работно тело ги разгледа aмандманот на член 2 за додавање на нов став (7) по ставот (6); Амандманот на член 2 за додавање на нов став (8) по ставот (7); Амандманот на член 4 ставови (1), (2) и (3); Амандманот на член 5 ставови (1), (2) и (3); Амандманот на член 6 во новиот член 59-а став (1); Амандманот на член 6 во новиот член 59-б ставови (1), (2) и (3) и Амандманот на член 7 ставови (1), (2) и (3) по Предлогот на закон за изменување и дополнување на Законот за данокот на додадена вредност поднесени од пратеничката група на Социјалдемократскиот сојуз.



Четврток, 24 јуни 2010 година

Триесет и деветта седница на Комисијата за земјоделство, шумарство и водостопанство 

Комисијата за земјоделство, шумарство и водостопанство на Собранието на Република Македонија, на 39. Седница, одржана на 23 јуни 2010 година ги разгледа Предлогот за изменување и дополнување на Буџетот на Република Македонија за 2010 година и Предлогот на закон за изменување и дополнување на Законот за вршење на земјоделска дејност (второ читање).

Седницата ја отвори и со неа заседаваше претседателот на Комисијата, г. Никола Ќуркчиев. Во својство на претставник на Владата на Република Македонија, на седницата присуствуваше г. Љупчо Димовски, министер за земјоделство, шумарство и водостопанство и г-ѓа Верица Проковиќ во својство на повереник на Владата на Република Македонија. 

Во образложението на Предлогот за изменување и дополнување на Буџетот на Република Македонија за 2010 година, г-ѓа Проковиќ особено нагласи дека со ребалансот на Буџетот се овозможува реализацијата на проектираната стапка на дефицит од 2,5%, што е како резултат на дисбалансот на проектираните и прибраните средства како прилив во Буџетот. 

Интервенциите што се преземаат во Министерството за земјоделство, шумарство и водостопанство се однесуваат на намалување на расходите во сферата на материјалните трошоци, стоки и услуги. 

Таа истакна дека се задржува политиката на доделување субвенции во земјоделското производство, а се интервенира во сферата на распределба на средства во програмите за развој на земјоделието.

Комисијата за земјоделство, шумарство и водостопанство го проследува Предлогот за изменување и дополнување на Буџетот на Република Македонија за 2010 година на натамошна постапка во Собранието на Република Македонија.

Во однос на Предлогот на закон за изменување и дополнување на Законот за вршење на земјоделска дејност, претседателот на Комисијата ги извести пратениците дека во определениот рок, утврден со Деловникот на Собранието на Република Македонија, поднесен е еден амандман.

Комисијата го разгледа амандманот за менување на член 5, поднесен од пратеникот Благородна Дулиќ, кој без дискусија едногласно беше усвоен од Комисијата со видоизменет текст.

Комисијата за земјоделство, шумарство и водостопанство го проследува  Предлогот на закон за изменување и дополнување на Законот за вршење на земјоделска дејност (второ читање) на натамошна постапка во Собранието на Република Македонија.



Среда, 23 јуни 2010 година, Берн, Швајцарија

Билатерална средба меѓу претседателот на Собранието на Република Македонија и швајцарскиот претседател на Советот на држави

При официјалната посета на Берн, Швајцарија, од страна на македонската парламентарна делегација, швајцарскиот претседател на Советот на држави (претседавач со Горниот парламентарен дом), г-ѓа Ерика Форстер-Ванини и претседателот на Собранието на Република Македонија, г. Трајко Вељаноски, остварија билатерална средба. 

На срдечната средба се разговараше за прашања поврзани со евроатлантскиот интегративен процес на Република Македонија и прашањата поврзани со спорот за името, како и за последиците од светската економска криза врз економиите на двете држави. Двете страни ja истакнаа важноста од развивање на соработката меѓу двата парламенти и истражувачката поддршка на нивната законодавна работа. 

Претседателот Вељаноски се заблагодари за помошта во формирањето на Парламентарниот институт во Собранието на Република Македонија.

„Пратениците се менуваат, но Парламентарниот институт ќе остане и ќе претставува сведоштво на она што го градиме заедно со Швајцарија“, истакна претседателот Вељаноски.

На крајот на средбата претседателот Вељаноски упати покана до претседателот на Советот на држави, г-ѓа Форстер-Ванини, да ја посети Република Македонија.

Парламентарниот институт ќе нуди истражувачки и аналитички услуги за пратениците и службата, со цел промоција на законодавната и надзорната улога на Собранието на Република Македонија и севкупните собраниски капацитети. 

За време на посетата на Швајцарија, претседателот Вељаноски беше придружуван од потпретседателот на Собранието, г. Јани Макрадули, пратениците: г-ѓа Силвана Бонева, г. Тахир Хани, г-ѓа Цветанка Иванова, г-ѓа Флора Кадриу, г-ѓа Роза Топузова Каревска, г. Кенан Хасипи и генералниот секретар г. Жарко Денковски.

Вкупната вредност на швајцарската донација за проектот на Парламентарниот институт изнесува околу 2.5 милиони евра.  



Среда, 23 јуни 2010 година

Средба на Националниот совет за евроинтеграции со г. Дејвид Лидингтон

Националниот совет за евроинтеграции денеска имаше средба со г. Дејвид Лидингтон, министер за Европа на Обединетото Кралство на Велика Британија и Северна Ирска



Вторник, 22 јуни 2010 година, Берн, Швајцарија

Претседателот на Собранието на Република Македонија Трајко Вељаноски свечено го размени Меморандумот за разбирање со директорот на одделот за соработка со Источна Европа од Швајцарската Агенција за развој и соработка – СДЦ Хуберт Ајзел

Претседателот на Собранието на Република Македонија, г. Трајко Вељаноски, го размени Меморандумот за разбирање за спроведување на проектот „Поддршка на основањето и развојот на Парламентарниот институт“ со г. Хуберт Ајзел, директор на Одделот за соработка со Источна Европа и член на Директоратот на Швајцарската агенција за развој и соработка - СДЦ



Вторник, 22 јуни 2010 година

Средба на г. Петар Поп-Арсов и г. Александар Спасеновски со г. Јозеф Даул

Во рамките на својата посета на Република Македонија, претседателот на ЕПП-пратеничка група во Европскиот парламент, г. Јозеф Даул оствари средби и со г. Петар Поп-Арсов, претседател на Комисијата за европки прашања во Собранието на Република Македонија и со Александар Спасеновски, копретседател на Мешовитиот парламентарен комитет РМ-ЕУ



Вторник, 22 јуни 2010 година

Надминување на етничката дискриминација и расизмот на Балканот во спортот

Претседателот на Комисијата за образование, наука и спорт, г. Сафет Незири и членовите на комисијата, г-ца Маринела Тушева и г. Цветко Грозданов денеска имаа состанок со делегација на Македонскиот центар за култура и развој, претставници од Советот на Европа - Директорат за спорт и ВИДИК



Вторник, 22 јуни 2010 година, Стразбур

Учество на делегација на Собранието на Република Македонија на Парламентарното собрание на Советот на Европа

Во работата на ПС на СЕ и неговите тела учествуваат шефот на делегацијата, г. Александар Николоски, членот г-ѓа Ермира Мехмети Деваја, како и замениците на членовите г. Зоран Петрески и г. Андреј Жерновски



Понеделник, 21 јуни 2010 година

Претседателот на Собранието на Република Македонија, г. Трајко Вељаноски, во работна посета на Швајцарија

Парламентарна делегација, предводена од претседателот на Собранието г. Трајко Вељаноски, од денеска е во работна посета на Швајцарија, каде свечено ќе се одбележи почетокот на соработката со швајцарската страна по повод основањето на Парламентарниот институт на Собранието, за што неодамна во Скопје беше потпишан Меморандум за разбирање



Понеделник, 21 јуни 2010 година

Не постои друга алтернатива освен да се стане членка на ЕУ

Претседателот на Комисијата за европски прашања, г. Петар Поп-Арсов и потпретседателите на Собранието на Република Македонија, г-ѓа Светлана Јакимовска и г. Рафиз Аљити, денеска остварија средба со претседателот на Чешката Република, г. Вацлав Клаус



Петок, 18 јуни 2010 година

Обраќање на претседателот на Собранието на Република Македонија, г. Трајко Вељаноски, на Конференцијата: Институционални механизми за соработка помеѓу Собранието и Граѓанскиот сектор во Република Македонија

Eдна од клучните карактеристики за степенот на развој на демократијата е степенот на вклученост на граѓаните во процесот на креирање политики. Една од најлесните алатки за постигнување на таа цел е невладините организации во Република Македонија да бидат вклучени во едукацијата и информирањето на граѓаните со цел да придонесат кон развој на подемократско општество



Петок, 18 јуни 2010 година

Претседателот на Собранието Трајко Вељаноски денеска го прими Генералниот секретар на НАТО Андерс Расмусен

Република Македонија продолжува со остварување на нашите стратешки определби, а тоа е членството во НАТО и во ЕУ, истакна на почетокот од средбата претседателот на Собранието Трајко Вељаноски. Фактот дека над 4 проценти од вкупниот број на Армијата на Република Македонија денес учествуваат во мировните мисии во Авганистан и во други држави, покажува дека сакаме во целост да ја понесеме нашата обврска кога станува збор за зачувување на мирот и борбата против меѓународниот тероризам и сите оние предизвици кои го загрозуваат светскиот мир. Односно, иако не сме членка на НАТО ние ги преземаме и ги остваруваме сите обврски како полноправна членка, а тоа ни го признаваат скоро сите држави-членки на Алијансата.



Петок, 18 јуни 2010 година

Јавна расправа по Предлог-законот за авторското право и сродните права

Комисијата за култура денеска одржа јавна расправа по Предлог-законот за авторското право и сродните права. Воведено излагање на јавната расправа имаше претседателот на комисијата, г. Васко Шутаров  и министерката за култура, г-ѓа Елизабета Канческа-Милевска.



Петок, 18 јуни 2010 година

Прво продолжение на Шеесет и петтата седница на Комисијата за финансирање и буџет

Комисијата за финансирање и буџет на Собранието на Република Македонија, на првото продолжение од Шеесет и петтата седница, одржана на 16 и 17 јуни 2010 година, како заинтересирано работно тело го разгледа Предлогот на закон за материјално обезбедување на невработени лица поради приватизација на претпријатија со општествена и државна сопственост



Петок, 18 јуни 2010 година

ЕУ лидерите ја јакнат буџетската контрола

На вчерашниот самит во Брисел, лидерите на ЕУ постигнаа договор за зголемување на буџетската дисциплина и транспарентноста во работењето на банките за да ја одбранат зоната на еврото, пред сè поради кризата во Шпанија.



Четврток, 17 јуни 2010 година

Средба на претседателот на Собранието на Република Македонија, г. Трајко Вељаноски, со делегација на Народноослободителната Армија на Народна Република Кина

На средбата, претседателот Вељаноски потсети на неодамнешната посета на Народна Република Кина и неговите средби со претседателот на Секинескиот народен конгрес, г. Ву Бангуо, како и на учеството на свеченото отворање на Светската изложба Шангај ЕКСПО 2010, каде што имаше средба со претседателот на Народна Република Кина, г. Ху Џин Тао, и истакна дека и оваа посета на армискиот врв на Народна Република Кина е во функција на натамошно продлабочување на пријателските односи меѓу двете држави и народи



Четврток, 17 јуни 2010 година

Тринаесетта седница на Буџетскиот совет

Буџетскиот совет на Собранието на Република Македонија на Тринаесеттата седница одржана на 17 јуни 2010 година гo разгледа Предлогот за изменување и дополнување на Буџетот на Република Македонија за 2010 година - Раздел 02001 Собрание на Република Македонија и врз основа на расправата едногласно ги усвои следните заклучоци:



Среда, 16 јуни 2010 година

Шеесет и петта седница на Комисијата за финансирање и буџет

Комисијата за финансирање и буџет на Собранието на Република Македонија, на Шеесет и петата седница, одржана на 16 јуни 2010 година, како матично работно тело го разгледа Извештајот за работата на Комисијата за хартии од вредност на Република Македонија за 2009 година.      

Воведно образложение по Извештајот даде претседателот на Комисијата, г-ѓа Марина Наќева Кавракова. Таа истакна дека Комисијата за хартии од вредност во 2009 година ги извршуваше своите надлежности насочени кон подобрување на регулаторниот систем; водење на ефикасен, законит и фер пазар на капитал; остварување на заштита на правата на инвеститорите, јакнење на довербата на инвеститорите во институциите на пазарот на капитал; подобрување на правилата за транспарентност во работењето на пазарот; унапредување на капацитетот и ефикасноста во работењето на Комисијата.

Во однос на регулаторната рамка на пазарот за хартии од вредност, во текот на 2009 година значајно е донесувањето на новиот Закон за инвестициски фондови и подзаконските акти кои ги донесе Комисијата заради операционализација на законот.

Во текот на 2009 година, Комисијата за хартии од вредност има одобрено 7 барања за издавање на долгорочни хартии од вредност, сите одобрени како однапред договорен пласман, т.е. приватни понуди.

Во 2009 година во Република Македонија имаат работено 6 друштва за управување со инвестициски фондови кои управувале со вкупно 9 отворени инвестициски фондови.

Исто така Комисијата во текот на 2009 година активно ја има извршувано едукативната функција, при што целна група на Комисијата беа акционерските друштва со посебни обврски за известување кои се водат во Регистарот на Комисијата.

Со цел олеснување на процесот на издавање на хартии од вредност, Комисијата за хартии од вредност во текот на 2009 година во соработка со IFC-Меѓународната финансиска корпорација има издадено Прирачник за издавање на хартии од вредност во кој е објаснет процесот на издавање на хартии од вредност.

Во соработка со УСАИД - Проект за деловно опкружување, Комисијата во текот на 2009 година има издадено Прирачник за преземање на акционерски друштва, со цел да им помогне  на компаниите полесно да ја разберат законската постапка за преземање на акционерско друштво со посебни обврски за известување.

Имајќи ја предвид нагласената важност на мултилатералниот Меморандум за разбирање на IOSCO и соработката со регулаторите на другите држави-членки, Комисијата за хартии од вредност од март 2009 година официјално е на листата Б потписнички на Меморандумот.

Комисијата со пет гласа „за“ и два „воздржани“ заклучи да му предложи на Собранието да го усвои следниот заклучок:

1. Собранието на Република Македонија да го разгледа и усвои Извештајот за работата на Комисијата за хартии од вредност на Република Македонија за 2009 година;
2. Овој заклучок заедно со Извештајот на Комисијата за финансирање и буџет на Собранието на Република Македонија да се достави до Владата на Република Македонија, Министерството за финансии и Комисијата за хартии од вредност.



Вторник, 15 јуни 2010 година

ЕУ посветена на европерспективата на Западен Балкан

Советот на министри на Европската унија вчеравечер ја потврди „недвосмислената посветеност на ЕУ на европската перспектива на Западен Балкан“, а воедно и ги поздрави напорите кои земјите од овој регион ги преземаат во насока на поскоро спроведување на реформите во клучните области, особено во областа на владеењето на правото, борбата против корупцијата и организираниот криминал



Понеделник, 14 јуни 2010 година

Шеесет и четврта седница на Комисијата за финансирање и буџет

Комисијата за финансирање и буџет на Собранието на Република Македонија на Шеесет и четвртата седница, одржана на 9 јуни 2010 година, како матично работно тело го разгледа Предлогот на законот за изменување и дополнување на Законот за данокот на додадена вредност (прво читање) и Амандманот на член 2 по Предлогот на закон за изменување на Законот за данокот на добивка поднесен од пратеничката група на Социјалдемократскиот сојуз



Сабота, 12 јуни 2010 година, Лимасол, Кипар

ОБРАЌАЊЕ НА ПРЕТСЕДАТЕЛОТ НА СОБРАНИЕТО НА РЕПУБЛИКА МАКЕДОНИЈА, Г. ТРАЈКО ВЕЉАНОСКИ НА ЕВРОПСКАТА КОНФЕРЕНЦИЈА НА ПРЕТСЕДАТЕЛИ НА ПАРЛАМЕНТИ

Дискриминацијата како појава е стара колку што е стара и човековата цивилизација. Таа, најчесто и во најгруба форма, се манифестира преку дискриминација врз основа на расна, етничка или верска припадност, но не треба да се занемаруваат и другите облици на дискриминација, како грубото кршење на човековите права и слободи. По лошото искуство во текот на Втората светска војна и со формирањето на Обединетите нации, а подоцна со формирањето на Советот на Европа, донесени се повеќе меѓународни документи со кои заштитата од која било форма на дискриминација претставува општо прифатен стандард и обврска на секоја држава. Имајќи  предвид дека како парламенти ги ратификуваме овие меѓународни документи, а потоа носиме закони, нашата одговорност е пресудна кога станува збор за заштитата од какви било форми на дискриминација.



Петок, 11 јуни 2010 година, Лимасол, Кипар

ОБРАЌАЊЕ НА ПРЕТСЕДАТЕЛОТ НА СОБРАНИЕТО НА РЕПУБЛИКА МАКЕДОНИЈА, Г. ТРАЈКО ВЕЉАНОСКИ, НА ЕВРОПСКАТА КОНФЕРЕНЦИЈА НА ПРЕТСЕДАТЕЛИ НА ПАРЛАМЕНТИ

Кога зборуваме за демократијата, секогаш мислиме на односите меѓу владата и парламентот, односно на нивната соработка, но и на тензиите кои се присутни во тие релации. За разлика од владата, која по својот карактер е многу помонолитна, парламентот како носител на законодавната власт ја изразува политичката, а во некои примери и националната плуралност на секое општество. Парламентите на секоја демократска држава работат максимално транспарентно, така што јавноста, односно оние кои нè избираат може да го оценат работењето и на мнозинството и на опозицијата



Петок, 11 јуни 2010 година

Триесет и осма седница на Комисијата за земјоделство, шумарство и водостопанство

Комисијата за земјоделство, шумарство и водостопанство на Собранието на Република Македонија, на 38. Седница, одржана на 10 јуни 2010 година, како матично работно тело во прво читање ги разгледа: Предлогот на закон за изменување и дополнување на Законот за пасиштата, Предлогот на закон за изменување и дополнување на Законот за сточарството и Предлогот за изменување и дополнување на Законот за вршење на земјоделска дејност



Четврток, 10 јуни 2010 година, Комисија за европски прашања

Дебата на тема „Невладините организации и евроинтегративниот процес во Република Македонија“

Комисијата за европски прашања на Собранието на Република Македонија денеска организираше дебата на тема „Невладините организации и евроинтегративниот процес во Република Македонија“, со цел актуелизирање на улогата на невладините организации и унапредување на соработката меѓу Собранието на Република Македонија и граѓанскиот сектор



Четврток, 10 јуни 2010 година

Дванаесетта седница на Комисијата за култура

Комисијата за култура на Собранието на Република Македонија на Дванаесеттата седница, одржана денеска, како матично работно тело ги разгледа:

1.  Предлогот на закон за изменување и дополнување на Законот за библиотеките - I читање;

2.  Предлогот на закон за изменување и дополнување на Законот за музеите - I читање;

3.  Предлогот на закон за изменување на Законот за употреба на македонскиот јазик - I читање;

4.  Предлогот на закон за изменување и дополнување на Законот за културата - I читање;

Воведно образложение во однос на точките на дневниот ред даде министерот за култура, г-ѓа Елизабета Канческа-Милеска.

Со своја дискусија по точките од дневниот ред се јавија и пратениците: г. Васко Шутаров,  г-ѓа Роза Топузова-Каревска, г-ѓа Лилјана Затуровска, г-ѓа Соња Цветковска, г-ѓа Наташа Јаневска и г-ѓа Весела Честоева.

Комисијата со мнозинство гласови ги поддржа измените и дополнувањата на предложените закони и оцени дека истите може да се дадат на натамошна постапка во Собранието на Република Македонија.

Среда, 9 јуни 2010 година

Шеесет и четврта седница на Комисијата за финансирање и буџет

Комисијата за финансирање и буџет на Собранието на Република Македонија на Шеесет и четвртата седница која се одржа денеска, како матично работно тело го разгледа Предлогот на закон за задолжување на Република Македонија со заем кај Европската инвестициона банка по Договорот за заем по Проектот „Водоснабдување и одведување отпадни води“ (второ читање).

Со оглед на тоа што по овој Предлог на закон не беа поднесени амандмани, Комисијата со шест гласа „за“ и три гласа „воздржан“ заклучи да му предложи на Собранието да го разгледа и да го донесе Законот за задолжување на Република Македонија со заем кај Европската инвестициона банка по Договорот за заем по Проектот „Водоснабдување и одведување отпадни води“.



Вторник, 8 јуни 2010 година

Триесет и седма седница на Комисијата за земјоделство, шумарство и водостопанство

Комисијата за земјоделство, шумарство и водостопанство на Собранието на Република Македонија, на 37. Седница, одржана на 7 јуни 2010 година, како заинтересирано работно тело, го разгледа Предлогот на закон за ратификација на Ротердамската конвенција за постапка за претходно добивање на согласност за одредени опасни хемикалии и пестициди во меѓународниот промет.

Седницата ја отвори и со неа заседаваше претседателот на Комисијата, г. Никола Ќуркчиев. Во дискусијата по Предлог-законот учествуваа пратениците Панче Дамески, Никола Ќуркчиев и Васко Шутаров.

На седницата, во својство на повереници на Владата на Република Македонија, присуствуваа г. Горан Стевчевски, државен советник во Министерството за надворешни работи, г-ѓа Лендита Дика, државен советник во Министерството за животна средина и просторно планирање и г. Нако Николовски, претставник од Министерството за земјоделство, шумарство и водостопанство.

Во образложението по Предлог-законот, г. Стевчевски укажа на фактот дека Ротердамската конвенција има за цел да ги ограничи користењата на одредени штетни хемикалии и пестициди кои се употребуваат за заштита на растенијата.

Тој истакна дека целта на Конвенцијата е да им помогне на земјите во транзиција и земјите во развој за контролирана употреба на хемикалиите и пестицидите во процесот на производство на храна, а со тоа да го заштити човековото здравје и животната средина од прекумерна употреба на истите, како и отстранување на опасноста од складирање на застарени штетни пестициди и хемикалии.

По завршување на расправата, Комисијата едногласно го усвои следниот заклучок:

• Комисијата за земјоделство, шумарство и водостопанство, како заинтересирано работно тело, го разгледа Предлогот на закон за ратификација на Ротердамската конвенција за постапка за претходно добивање на согласност за одредени опасни хемикалии и пестициди во меѓународниот промет и го поддржа во предложениот текст.



Понеделник, 7 јуни 2010 година

ОБРАЌАЊЕ НА ПРЕТСЕДАТЕЛОТ НА СОБРАНИЕТО НА РЕПУБЛИКА МАКЕДОНИЈА, Г. ТРАЈКО ВЕЉАНОСКИ, НА ОСМАТА КОНФЕРЕНЦИЈА НА ПРЕТСЕДАТЕЛИ НА ПАРЛАМЕНТИ ОД ЗЕМЈИТЕ НА ПСЈИЕ

Најнапред сакам да изразам благодарност на Големото народно собрание на Република Турција и на претседателот, г. Мехмет Али Шахин, за одличната организираност на оваа наша средба, како и за срдечноста и гостопримството. Самата иницијатива овој парламентарен собир да биде посветен на прашањето од несомнен заеднички интерес - унапредувањето на парламентарната димензија на соработката во рамките на Процесот за соработка во Југоисточна Европа (ПСЈИЕ), ми дава за право да верувам дека Конференцијата, ќе биде забележана и како почеток на процесот на нова, континуирана фаза во нашата регионална соработка



Понеделник, 7 јуни 2010 година

ПРЕТСЕДАТЕЛОТ НА СОБРАНИЕТО НА РЕПУБЛИКА МАКЕДОНИЈА, г. ТРАЈКО ВЕЉАНОСКИ, НА ОСМАТА КОНФЕРЕНЦИЈА НА ПРЕТСЕДАТЕЛИ НА ПАРЛАМЕНТИ ОД ЗЕМЈИТЕ-ЧЛЕНКИ НА ПРОЦЕСОТ ЗА СОРАБОТКА ВО ЈУГОИСТОЧНА ЕВРОПА

На Осмата конференција на претседатели на парламенти од земјите на Процесот за соработка во Југоисточна Европа, која од 6 до 8 јуни 2010 година се одржува во Анталија, Република Турција, учествуваат претседателите на парламентите од регионот, како и претставници од повеќе европски парламентарни собранија и институции. Конференцијата е концентрирана на натамошна регионална соработка и институционализација. Се очекува тоа да доведе и до создавање на парламентарно собрание, што во другите региони во Европа е веќе одамна присутна пракса, која резултира со бенефит за сите учесници



Понеделник, 7 јуни 2010 година, Комисија за европски прашања

Улогата на парламентот - клучна на патот кон ЕУ

Претседателот на Комисијата за европски прашања, г. Петар Поп Арсов и членовите:  г-ѓа Станка Анастасова, г. Андреј Жерновски, г. Игор Ивановски, г-ѓа Владанка Авировиќ, г-ѓа Силвана Бонева, г. Александар Спасеновски, г-ѓа Христина Рунчева, г. Васко Шутаров, г. Панче Дамески и г. Хајрула Мисини, денеска остварија средба со г. Андреас Ронки, министер за европски политики на Република Италија.



Петок, 4 јуни 2010 година, Комисија за култура

Второ продолжение на Надзорната расправа за имплементација на Законот за донации и за спонзорства во јавните дејности

Комисијата за култура на Собранието на Република Македонија, денеска, во рамките на Единаесеттата седница, го одржа второто продолжение на третата Надзорна расправа на тема „Имплементација на Законот за донации и за спонзорства во јавните дејности“.



Четврток, 3 јуни 2010 година

ЕУ со целосна поддршка за Западен Балкан

„Мислам дека денеска во Сараево е склучен нов договор меѓу земјите од Западен Балкан и ЕУ. Договор околу иднината, новите надежи, договор за мир и интеграција на што поголем број земји во ЕУ“ – истакна шпанскиот министер за надворешни работи, г. Мигуел Моратинос, на вчерашниот состанокот во Сараево, оценувајќи го како историски



Четврток, 3 јуни 2010 година

ЧЕТИРИЕСЕТ И ПЕТТА СЕДНИЦА НА КОМИСИЈАТА ЗА НАДВОРЕШНА ПОЛИТИКА

Комисијата за надворешна политика на Собранието на Република Македонија, на 45. седница, одржана денеска по повод настаните со хуманитарниот конвој во близината на Појасот Газа, го донесе следниов Заклучок



Среда, 2 јуни 2010 година

Донациите и спонзорствата се важен извор за поддршка во реализирањето на многу јавни цели

Комисијата за култура на Собранието на Република Македонија, денеска, во рамките на Единаесеттата седница, го одржа првото продолжение на третата Надзорна расправа на тема „Имплементација на Законот за донации и за спонзорства во јавните дејности“



Вторник, 1 јуни 2010 година

Надзорна расправа на тема „Имплементација на Законот за донации и за спонзорства во јавните дејности“

Комисијата за култура на Собранието на Република Македонија денеска, во рамките на Единаесеттата седница, ја одржа третата Надзорна расправа на тема „Имплементација на Законот за донации и за спонзорства во јавните дејности“.



Вторник, 1 јуни 2010 година, Мадрид

КОСАК дава поддршка за проширување на Европската унија

На Конференцијата на комисиите за европски прашања на земјите-членки на ЕУ - КОСАК што вчера и денес се одржува во Мадрид, во рамките на шестмесечното шпанско претседателство со Европската унија, на која учествува претседателот на Комисијата за европски прашања, Петар Поп-Арсов, расправата беше фокусирана на прашања поврзани со реализацијата на шпанските проиритети и тоа пред сè имплементацијата на Лисабонскиот договор во поглед на институционалното функционирање на европските институции, како и актуелната економска криза во Европската унија



Вторник, 1 јуни 2010 година, Рига

Делегација на Собранието на Република Македонија учествуваше на Пролетното заседание на Парламентарното собрание на НАТО

Талат Џафери, шеф на делегацијата, учестуваше на церемонијата на донирање на книги со НАТО тематика за новата национална библиотека на Латвија, што, исто така, беше организирана во рамките на заседанието