Понеделник, 30 декември 2013 година
Јавна расправа на тема: „Подготовка на закон за семејно насилство“
Комисијата за еднакви можности на жените и мажите, Комисијата за труд и социјална политика и Клубот на пратенички на Собранието на Република Македонија, во соработка со Министерството за труд и социјална политика и Македонското женско лоби, на 27 декември 2013 година одржаа јавна расправа на тема: „Подготовка на закон за семејно насилство“.
Воведно излагање имаа: претседателката на Комисијата за еднакви можности на жените и мажите, г-ѓа Лилјана Поповска; претседателката на Комисијата за труд и социјална политика, г-ѓа Цветанка Иванова; координаторката на Клубот на пратенички на Собранието на Република Македонија, г-ѓа Лилјана Кузмановска; директорката на Македонското женско лоби, г-ѓа Даниела Димитриевска и министерот за труд и социјална политика, г. Диме Спасов.
На темата свои обраќања имаа: г-ѓа Софија Спасовска, претставник на Министерството за труд и социјална политика на Република Македонија, која го престави концептот за законот и основните начела според кој се работи истиот, потоа г-ѓа Вера Николиќ, претставник на Меѓуопштинскиот центар за социјални работи, која даде осврт на предложените мерки за заштита на жртвите на семејно насилство и сторителите и г-ѓа Марија Ралева, национален координатор за борба против насилство од Светската здравствена организација, која говореше за заштитата на децата сведоци на семејното насилство.
По дискусијата беа донесени следните заклучоци:
1. Комисијата за еднакви можности на жените и мажите, Комисијата за труд и социјална политика и Клубот на пратенички го поддржуваат подготвувањето на законот за семејно насилство и даваат поддршка за основните начела на кој се темели неговата подготовка, во кои се инсистира на:
- почитување на достоинството на жената;
- итност во постапувањето;
проширување на опсегот на жртвите;- проширување на опсегот на економските аспекти на семејното насилство;
- посветување на посебно внимание на децата;
- заштита и на други ранливи групи;
- утврдување на институциите и невладините организации каде ќе се пријавува семејното насилство;
- поголема улога на општините;
- проширување на надлежностите на службите за отстранување на насилникот;
- формирање на мултисекторски тим за подготовка на законот во кој ќе бидат вклучени претставници на институциите, невладините организации, Собранието на Република Македонија, судството, здравството и други стручни лица.
2. Комисијата за еднакви можности на жените и мажите, Комисијата за труд и социјална политика и Клубот на пратенички препорачуваат овој закон да биде направен во рок што ќе биде потребен за изготвување на добар и квалитетен закон.